روتين العنايه اليومي - skincare routine

  السلام عليكم ورحمه الله وبركاته 

روتين العنايه بالبشره من اهم الاشياء اللي لاااازم لازم تسوينها،ولا على بشرتك السلام 

حتى لو بشرتك صافيه في بعض الاشياء البيسك اللي المفروض تسوينها عشان تبان بشرتك صحيه ومترطبه وعمرها صغير. 

حبيت ابدأ بأول شيء اللي هو مساعده بشرتك من جوا بالفيتامينات اللي انتي ناقصتها بجانب اشياء ثانيه اكيد "ماانصح بأستخدام نوع معين قبل استشاره طبيب او التأكد من تناسبها معك " 

الفيتامينات عموما مهمه لانها تكمل الناقص بجسمك،لكن مفعولها مايطلع الا مع الاهتمام اكيد والروتين اليومي 

الكليراسونيك،منقذتي بدون مبالغه،لها سلبيات وايجابيات بذكرها مع طريقه الاستخدام 

طريقه استخدامي لها : 

انا استخدمها مره وحده بالاسبوع للتقشير ، وبكل مره حطيت فيها ميك اب 

نادرا احط مكياج الا اذا طلعت ولو حطيت نتفه لازم اشيله بالكليراسونيك،احسها تنظف البشره من قلب وتشيل لي الميك اب حتى اخر نقطه. 

واذا ماكنت حاطه مكياج بهالاسبوع وحسيت بشرتي عليها طبقه غريبه وجااافه وحالتها مزريه على طول استخدمها وتنعم لي بشرتي وتهيء بشرتي للماسك ، احس بشرتي تتشرب الماسك وتستفيد منه اكثر بعد الكليراسونيك 

ايجابيات: 

- تنعيم البشره 

- توحيد لون البشره مع الاستخدام 

- تهيء البشره لاستقبال اي ماسك او كريم وتتشربه اكثر 

السلبيات : 

- سعرها المرتفع شوي ، اخذتها من سيفورا اظن ب ٧٧٠

- الفرشه لازم تتغير كل فتره اظن كل ٣ شهور

- في ناس تطلع لهم حبوب صغيره انا ماواجهتني هالمشكله الحمد لله

طيب، اذا بحط مكياج اشيله بس بالكليراسونيك ؟ 

لا، اول شي اخذ قطنه واخذ مزيل مكياج وامسحه ، كل اللي بالصوره كويسين مره لكن البايوديرما هو الافضل بدون منااازع

غسول الوجه اكيد من الاشياء المهمه كمان ، لي فتره استخدم كلين اند كلير وكل مره استخدم نوع احسها تنظف بشرتي كويس 

ثاني واحد فيه سحر انا متأكده ، استخدمه اذا طلعت لي حبه وابغا اشيلها احطه بس على مكان الحبه وافركه بهدوء واغسله وارطب، مررره كويس ويشيل لي حباتي ماشاء الله حتى بعضهم بيوم واحد بس ! 

سعره ٥٥ ريال وتلقونه بالصيدليات. 

التونر بعد الغسول يساعد على تقفيل المسام واحسه ينظف بشرتي بزياده ، مويه الورد تنفع بديل للتونر كمان 

الاثنين كويسين، واحد تلقونه بكل الصيدليات ب ٧ ريال اظن، والثاني من كيلز،موجوده في مطار دبي عطوني هذا سامبل وعجبني بأذن الله اشتري الفل سايز.

 

بعد كل هالتنظيف بتحسين بشرتك بتتقطع من النظافه هنا انا ارتاح ههههههههه 

بس مااحب شعور الجفاف ف احرص على الترطيب دايما. 

اذا حسيت بشرتي مررره تحتاج ترطيب ارطبها بزيت " احرصي يكون بالليل " ماانصح ترطبين بزيت الصبح لانه ثقيل وغير كذا يمكن يسمرك مع الشمس 

عندي خيارين ، اما زيت زيتون عادي اشتريت علبه وحطيته فيها عشان يسهل علي ، على وجهي قليل احطه بس دااايم ارطب جسمي فيه ولا اظن بلاقي احسن منه لجسمي 

وزيت فيتامين e لوجهي احبببه مره يرطب واصحى احس بشرتي مرره مترطبه،مدري اذا موجود عندنا جبته من امريكا،اكيد في بديلات له تلقونها عند التاجرات او اذا حابه تطلبين. 

اخر واحد حبيب القلببب ، اولا هالشي طبي ، مافيه عطور وسعره ؟؟ ١٢ ريال بس 

خفيف على البشره ورهييب مره مره، احطه بالصبح وقبل المكياج على طول تتشربه بشرتي 

شفتو لما اقولكم يجيك يوم بالاسبوع بشرتك تصير مزريه وتحزن ؟ بعد الكليراسونيك احط ماسك مره يررطب بشرتي احسها تشرب مويه 

احطه اكثر وقت اقدر عليه ، هذا كمان من كيلز. 

طيب، وش اهم شي بالدنيا اللي الكل يسحب عليه ؟؟ 

واقي الشمس ! 

لو ماتسوين شي وتحطين واقي شمس برضى عليك،مررره مهم الواقي اذا ماحطيتيه بشرتك بسرعه بتطلع لها تجاعيد وتطلع لك تصبغات واشياء صدقيني انتي مو محتاجتها . 

كذا اكون خلصت واسفه اذا كثرت كلام الموضوع مهم يحتاج كل هالشرح 😂

لاتنسون تتابعوني على المدونه،شكرا لكم..

مشتريات كيكو - kiko milano haul.

السلام عليكم ورحمه الله وبركاته

اليوم بتكلم عن مشترياتي من كيكو،ماركه مو موجوده عندنا بالسعوديه ، تقدرين تطلبين منها اون لاين او تشترين من محلاتهم واظن انهم موجودين بكثير اماكن بأوروبا 

اولا اسعار هالماركه رهييييبه مره ، يعني شريت نص اللي عندهم وتقريبا طلعت مبلغ يعتبر قليل على الكميه اللي خذيتها،نصها كانت هدايا والنص الثاني لي

وهذا موقعهم اون لاين :   http://www.kikocosmetics.com/en-us/?overlayClosed=true

اول شي خذيته الايشادو وفي كم نوع عندهم 

اول نوع خصيصا حبيييييته مرره مره اكثر من النوع الثاني والكريمي 

يندمج لما تحطينه بسهوله مره ولونه واضح كمان ، اخذت منه ٤ الوان وهي اللي ناسبتني من عندهم باقي الالوان انا مااحب احطها مثل الالوان الكول تون "ماعرفت اشرحها بشكل ثاني" ، احب الالوان الدافيه اكثر 

هذا اللون من احب الالوان على قلبي ، بني على احمر مره يطلع يجنن على العين وكل الوان العيون احسه يبرزها ، من كثر مااحبه بعض الاحيان احط برايمر واثبته ببودره واحط هاللون بس على كسره العين مع مسكره يطلع رهييييب             "مات"

وهذا سواتش:

رقمه : 41 

ثاني واحد و احس هاللون من اهم الالوان ، بقولكم ليش 

البرتقالي على العين نقطه،ركزي على نقطه قبل ماتحطين اي لون يخليه يبرز ويطلع يجنن 

انا افضل احطه قبل كل شي في ناس تحب بعد ماتحط البني مثلا على الكسره تاخذ فرشه ثانيه وتحط منه وتدمج الحواف وبرضو يطلع مره رهيب، لاتتخوفون من اللون مايبان بس يبرز الشدوات الثانيه اذا استعملتيه صح                           "مات"

وهذا سواتش : 

رقمه : 44

ثالث لون يعتبر من الالوان البيسك ، بني مو غامق ولا فاتح ، كل يوم على كسره العين ومسكرا يطلع ناعم ويجنن ، وان بغيتيه يثقل تزيدين ويصير لوك لسهره ، هذا احلى شي بشدوات كيكو ، تقدرين تتحكمين بثقلها وخفها على حسب يدك         "مات"

وهذا سواتش : 

رقمه : 47

اخر لون يعتبر عودي شوي على موف لونه غريب وحلو ، نسبه شمر بسيطه ، كمان يبرز لون العين                            "شمر"

وهذا سواتش : 

رقمه : 54

ثاني نوع من الشدوات ماعجبني مره ، مايبان اللون معك نفس الاولى وخصوصا الالوان الفاتحه اللي فيها شمر ، يبغالهم شغل على مايبانون ، ماراح اذكر الوانهم لاني ماانصح فيهم 

بعدها خذيت الكريم ايشدو ، ووش اقول وش اخلي يهبلوووون مره ، ثباتهم عالي جدا جدا ، الوانهم حلوه ، اذا ابغا لوك خفيف احطهم على كل الجفن وادمجهم ويطلعون يهبلون 

وهذا سواتش : 

الاول رقمه : 06

الثاني رقمه : 05

نجي عند المسكرات اللي شوووي تحمست فيها انا واختي ، متحمسين من كثر المدح اللي على مسكراتهم واللي خلاني افكر فيه اصلا هو المسكرات ، صراحه هم حلوين بس مو ذاك الزود ، يعني احسهم يومياات مره ماتسوي شي مره ملفت ، وسعرها حلو ، وبعد جربت البرايمر الابيض اللي قبل المسكرا وحسيته يكتل لي شوي. اعطيهم كلهم ٦\١٠ 

والحين الكريم هايلات حقهم الرهيب ، خليني اقولكم بالبدايه كررررهته مره لاني حطيته من علبته على وجهي وكتل لي الفاونديشن وكرهته احسب المشكله منه طلعت مني ، جربت احطه يوم ببيوتي بلندر وصدق فررررق ، يهبل وثباته عالي ويعطيك لوك ديوي مره مره ، اعطيه ١٠\١٠

سواتش : 

رقمه : 100

اخر شي اخذت من عندهم فرش لدمج الايشادو ووحده ثانيه لدمج الكريم هايلات ، الثنتين حلوووه خصوصا حقت الشدو تهبل ماندمت اني اخذت منها ٢ ، والفرشه اللي اخذتها للهايلات صرت استخدمها للكنتور الكريمي ورهيبه

فرشه الايشادو رقمها : 200

فرشه الكريم هايلات : 107

" عذرا على الفرشه الوصخه " هههههههه 

وهذا كان كل شي ، شكرا لكم. ❤️ 

كيف اعتني بقطتي؟ – HOW TO TAKE CARE OF YOUR KITTEN?

العنايه بالقطط تحتاج الكثير بالبدايه حتى تبدأ تتعود على هالشيء ويصير شي روتيني سهل بأذن الله.

المهم هو انك تعاملينها بالضبط زي بنتك،من وجهه نظري،لاتجيبين حيوان اليف وتهملينه ابدا ابدا مهما صار او ابعدي عن الفكره تماما ، القطط من اجمل الحيوانات والعنايه فيهم ممتعه

اولا،اكثر سؤال يسألونه الناس،اشتريتها صغيره وش اسوي فيها؟ كيف اعلمها وكيف اهتم فيها

اخذت قطوتي الاولى والثانيه بنفس العمر،كلهم بعمر ٤٥ يوم بس،وشفت الفرق بين الاولى والثانيه بالتعود والسلوك يعني على حسب حظك،ان جاتك تعرف للتر بوكس وهذا اهم شي القطوه لازم تتعود عليه ، اذا ماكانت تعرف له بتتعبين معها شوي لكن الطريقه بتكون سهله بأذن الله لكن يحتاج لها صبر + وقت

اول شي اذا اكلت شيليها انتي بنفسك وحطيها باللتر بوكس عشان لو كانت بتسوي شيء تسويه فيه على طول

ان سوت على الارض خذيها بنفس الوقت وحطيها بوسط اللتر بوكس ، كثير يقولون رشي عليها مويه ببخاخ بس انا اشوف

هالشي غلط،ومدى فعاليته ماادري عنها بصراحه،مره مرتين ثلاثه بتتعود هي من نفسها تروح له بعد الاكل ان حست ان هي    محتاجه تروح حمام وهالشيء زي ماقلت شوي يحتاج وقت لكنها بترجع تتعود والقطط بطبيعتها نظيفه جدا جدا

طيب،متى اروشها وهي بهالعمر؟؟ كيف انظفها واهتم بشعرها؟

انا ضد ترويشهم وهم بعمر صغير لاني جربت مع وحده من قططي ومرضت على طول وابتلشت انا،ابعدي عن ترويشهم لين على الاقل يصير عمرها من شهرين ونص الى ٣ شهور،وهي صغيره جيبي مناديل الاطفال المعطره وامسحي على شعرها وان توصخت هذا الحل الامثل،واذا بدت تكبر روشيها كل شهر مره،واذا اضطر الامر كل اسبوعين،لان القطط اصلا نظيفه تنظف نفسها دايم وشعرها بلسانها سبحان الله وهذا شي فطري.

شعر القطط الشيرازيه بالذات يبغاله عنايه زايده عن باقي القطط اللي شعرها قصير،الشيرازيه وغيرها كلهم يبغالهم تمشيط كل يوم عشان تشيلين الشعر اللي قاعد يطيح بدال ماتلحسه وهي تنظف نفسها وبعدها بفتره ترجعه على شكل كوره مقرفه شوي،ف انتي ابعدي نفسك عن هالشي من البدايه ومشطي لها بانتظام،وبرضو عشان مايطيح شعرها بكل مكان وتلقطينه كل بعد شوي،وبرضه لاحظت لما تبدين تهملينها شعرها يبدأ يتعقد ولما تجين بعدين تمشطينه تتعبين انتي وهي تتعب معك

من ناحيه ثانيه مهم تلاحظينها وانتي رايحه تشترين قطوتك الكيوته هي انك تسوين كالتالي:تفحصينها كويس كويس مررره ! اكثر المشاكل المنتشره بالقطط هي الفطريات المصيبه،طيب رغد كيف اعرف ان فيها فطريات ؟؟

ماحبيت اضيف صور يمكن تكون مقرفه للبعض ولكن بحاول اوصفه وصف دقيق عشان تعرفين اذا كانت مريضه ولاتشترينها لان سالفه الفطريات ومعالجتها طويله عريضه،اطلبي انك تمسكينها وتحسسي بيدك كل جسمها واذا حسيتي في مكان مافيه شعر لو نقطه يمكن تكون هذي بدايه المرض،يكون فاضي قريب للصلع دائره بوسط شعرها وحوالين هالدائره مثل القشور واحمر شوي اعرفي انها مريضه بالفطريات على طووول،واغسلي يدك بعدها

عانيت من الفطريات مع قطوتين قد شريتهم ولما قررت اعالجهم كان المبلغ من المحل غير معقول ، للامانه ماسألت الا محل واحد وهونت معد رحت الباقي احتمال يكون نصب علي عاد الله اعلم تركت عنده القطوه ومشيت.

وقبلها قطوه ماكنت ادري بمرضها وسببت لنا حبوب غريبه بأجسامنا انا واخواني ، بصراحه صحه القطه اهم من كل شي لاتستهونون فيه

شي ثاني انتبهي منه اذا كانت القطوه فيها حبوب بشعرها بتحسينها وانتي تمررين يدك عليها .

طيب في ناس تسأل:قطوتي كانت نشيطه بعدها صارت بس تنام وكسوله،هل هي مريضه؟؟؟؟

بالغالب لا،القطوه تنام كثير وهي صغيره كثير كثير مره ، مثلها مثل الاطفال وقت نومها اكثر من وقت قومتها،وحتى لو كبرت بعض القطط كسوله خلاص تصير بس ودها تتسدح هنا يجي دورك انتي تجيبين لها العاب او كور صغيره او الشي المفضل عند القطط،الجري ورا حبل ههههههههه

اخر شي بنتطرق له هو : قطتي تكره الترويش وش اسوي فيها ؟؟ 

مااظن بشوف بحياتي قطوه تحب المويه،المهم هو طريقتك بالترويش ان الحمام تكون درجه حرارته مناسبه للقطه عشان ماتبرد،طيب كيف؟؟ شغلي الدش مويه حااره وسكري الحمام كم دقيقه بعدين روشيها بمويه معتدله وامسحي عليها بتهدأ معك بس لازم بالبدايه تنهبل شوي

طيب وش احتاج عشان اروشها ؟؟

اذا قدرتي تشترين شامبو خاص فيهم خير وبركه،ماقدرتي شامبو الاطفال يؤدي الغرض،ومنشفه اكيد ،طلعيها ونشفيها كويس وحطيها بغرفه دافيه ، ناس تحب تخليهم ينشفون لحالهم وناس مثلي تحب تنشفهم بالاستشوار اسرع وامتع صراحه 

بكذا ان شاء الله اكون غطيت الاشياء الاساسيه. وشكرا لكم